Қайғылы оқиғаның кадрлары 30 қыркүйекте әлеуметтік желілерде жарияланды.
Алматы облысында жантүршігерлік жол апатынан сегіз адам қаза тапты, деп хабарлайды Qaz365.kz.
Қайғылы оқиғаның кадрлары 30 қыркүйекте әлеуметтік желілерде жарияланды. Бейнежазбада 29 қыркүйек күні болған апаттың салдары көрсетілген: соққыдан темір-терсегі шытынап, танылмай қалған көліктер жол бойында шашылып жатыр, маңайда қаза тапқандардың денелері көрінеді.
Алматы облыстық полиция департаменті баспасөз қызметінің мәліметінше, оқиға Алматы – Бішкек автожолының 107-шақырымында болған.
Жол-көлік оқиғасы бойынша полицейлер сотқа дейінгі тергеуді бастады. Алдын ала деректерге сүйенсек, Lexus автокөлігі қарсы жолаққа шығып кетіп, Toyota Alphard көлігімен соқтығысқан. Салдарынан сегіз адам оқиға орнында қаза тауып, тағы екі адам ауруханаға жеткізілді. Қазіргі таңда апаттың мән-жайын анықтау үшін барлық қажетті тергеу амалдары жүргізілуде, – делінген полицияның түсініктемесінде.
Сонымен қатар полиция жүргізушілерді жол ережесін қатаң сақтауға және жолда аса мұқият болуға шақырды.
