Студент қыздардың көбі кәмелетке толмаған
Астаналық студент «Еркежан» тұрғын үй кешеніндегі хостел иесі өзіне күш көрсеткенін мәлімдеді, деп хабарлайды Qaz365.kz тілшісі ZTB-ға сілтеме жасап.
Қыз өзінің қауіпсіздігіне алаңдап, аты-жөнін жарияламауды сұраған.
Аталған хостел Sat Apartments компаниясына тиесілі және Мақсұт Нәрікбаев көшесі, 12-үйде орналасқан. Онда негізінен студент қыздар тұрады, кейбірі — кәмелетке толмағандар.
Зардап шеккен қыздың айтуынша, ол жиі хостел иесінің жыныстық сипаттағы қудалау әрекеттеріне ұшыраған.
«Ол маған екі рет күш қолданды. Бұл жағдайға басқа қыздар да тап болған. Мен 7 қазанда Нұра аудандық полиция басқармасына және прокуратураға арыз түсірдім. Бірақ ешқандай шара қолданылған жоқ. 26 қазанда Бас прокуратураға қайта жүгіндім, бірақ жауап болмады. Қазір өз өмірім мен өзге қыздардың қауіпсіздігіне алаңдаймын», – дейді жәбірленуші ZTB.kz-ке.
Қыздың сөзінше, хостел иесі әлеуметтік жағдайы төмен студент қыздарды арзан баға арқылы алдап шақырып, кейін қайтарылмайтын депозит пен бірнеше айлық алдын ала төлем талап еткен.
«Кімнің көңілі толмаса, ақшасын қайтармай қояды», – дейді ол.
ZTB.kz-тің мәліметінше, жақында тұрғындар әлеуметтік желіде видео жариялаған. Онда, куәгерлердің айтуынша, хостел иесі бір қызды ұрып-соққан.
Кейін ол қыздың телефонын тартып алып, жаңбыр астында пижамамен көшеге қуып шыққан.
«Біз енді қайда жүгінерімізді білмейміз. Ол адамның полицияда таныстары мен ықпалы бар сияқты. Сол себепті өзін ешкімге тәуелсіз сезінеді», – делінген шағымда.
