Есболатов түсіндірмесінде оның сөзі қате жеткізілгенін және дұрыс түсіндірілмегенін айтты
Алматы облысы әкімінің бірінші орынбасары Қанат Есболатов Талғарда өткен жиында айтқан «мүгедектерді онсыз да Алла жазалаған» деген сөзі қоғамда резонанс тудырып, көпшіліктің наразылығын туғызды. Осыған байланысты шенеунік ресми түрде халықтан кешірім сұрады, деп хабарлайды Qaz365.kz.
Есболатов түсіндірмесінде оның сөзі қате жеткізілгенін және дұрыс түсіндірілмегенін айтты.
«Әлеуметтік желіде тараған видеоға қатысты ақпарат беруді жөн деп санаймын. Денсаулық сақтау министрімен Талғарда өткен кездесуде халық көп жиналды. Сұрақтар да өте көп болды, кездесу шамамен төрт сағатқа созылды. Кезегін күткендердің арасында мүмкіндігі шектеулі жандар да болды. Сол сәтте регламентті сақтау қажеттігін ескертіп, орыс тілінде айтқан сөзімде қателік жібердім. Негізі “Құдай үлкен сынақ берген” деп айтпақ едім, бірақ ойымды дұрыс жеткізе алмадым», – деді ол.
Әкім орынбасары өз сөзінің көпшіліктің көңіліне тигенін мойындап, шын жүректен кешірім сұрады.
«Айтқан сөзімнің кейбір азаматтарға ауыр тигенін түсінемін. Бұл үшін шын ниетіммен кешірім сұраймын. Қай жиын болмасын, егде жастағы тұрғындар мен мүмкіндігі шектеулі азаматтарды кезексіз тыңдау – адамгершілікке сай іс деп есептеймін», – деді Есболатов.
Ол сондай-ақ кездесуде көтерілген барлық сұрақтар әкімдік пен министрлік тарапынан қаралып, тиісті хаттамаға енгізілгенін жеткізді.
«Кездесуде көтерілген мәселелердің көпшілігіне сол жерде жауап берілді, ал қалғандары министрлік пен әкімдік бақылауына алынды. Бұл бағыттағы жұмысты жалғастырамыз», – деді облыс әкімінің бірінші орынбасары.
Еске сала кетейік, әлеуметтік желіде тараған видеода Есболатовтың «мүгедектерді Алла жазалаған» деген сөзі қоғам тарапынан сынға ұшырап, мемлекеттік қызметкерлердің этикасы туралы пікірталас туындаған еді.
