KazTAG халықаралық ақпарат агенттігінің бас директоры Әсет Матаев пен бас редактор Әмір Қасенов қылмыстық іске қатысты күдікті деп танылды. Бұл іс Freedom Finance компаниясының шағымынан кейін қозғалған. Агенттік олардың басшылығына қатысты алаяқтық туралы жәбірленушілердің сөздері келтірілген материалдар жариялаған, деп хабарлайды Qaz365.kz тілшісі агенттікке сілтеме жасап.
Агенттік адвокатының айтуынша, Матаев пен Қасеновті күдікті деп тану процессуалдық талаптарды сақтамай жүзеге асқан.
«Бұл мәртебені адамның қатысуынсыз тағайындау үшін ол адам тергеуден қашуы немесе әрекеттен жалтаруы тиіс. Ал Матаев та, Қасенов те ешқандай тергеуден қашпаған», – дейді адвокат Рена Керимова.
KazTAG редакциясы қылмыстық іс қозғалғанын бірнеше ай бойы білмей келген. Тергеу 18 тамызда басталғанымен, редакция тек 20 қарашада өзге БАҚ арқылы хабардар болған. Осы уақыт аралығында полиция бірнеше сараптама жүргізіп, бұл туралы редакцияны ескертпеген.
Адвокат Ерлан Макенов тергеу әрекеттерінің УПК талаптарына сай жүргізілмегенін атап өтті. Оның сөзінше, сараптама тағайындау туралы қаулы күдікті тарапқа көрсетілмеген, бұл – заң бұзушылық.
Сонымен қатар 21 қарашада тергеуші Заманбек Тазабеков Қасеновпен әңгіме барысында «сұрақтарды оның басшыларының айтатынын» айтып қалған. Тергеушіден бұл әрекетінің себебін сұрағанда, ол «маған басшылық солай тапсырды» деп жауап берген.
KazTAG редакциясы бұл істі алдағы сайлау қарсаңындағы қысым мен қорқыту әрекеті деп санайды. Агенттік бұл істің артында жоғары лауазымды тұлғалар болуы мүмкін екенін айтады. Сондай-ақ олар «беделсіз тұлғалардың тізімі» жасалып, оған ондаған журналист, құқық қорғаушылар мен қоғам белсенділері енгізілгенін алға тартады.
KazTAG материалдарына негіз болған жәбірленушілер – адвокат Светлана Оралбаева, Гүлмира Исаева, Жанна Капарова және Карина Гайфулина. Олар редакцияға өздері хабарласып, Freedom Finance компаниясына қатысты шағымдарын жеткізген. Мұнымен қатар Freedom Finance компаниясына жолданған сұраулардың ешбірі жауапсыз қалған.
Агенттік Freedom Finance-тің Ресей санкцияларын айналып өтуге қатысы бар деген айыптаулар жөніндегі дыбыс жазбасын АҚШ пен ЕО елшіліктеріне, сондай-ақ ҚР Ұлттық банкке, АРРФР-ға және Экономика министрлігіне жолдағанын хабарлады.
Әсет Матаев пен Әмір Қасенов 9 желтоқсанда Алматы қаласы Полиция департаментіне жауап алуға шақырылған.
