Алматы халықаралық әуежайы әлеуметтік желілерде тараған әуе кеңістігі жабылды деген ақпаратқа қатысты түсініктеме берді. Кейбір жазбаларда қалада әскери іс-қимылдарға байланысты ұшулар тоқтатылғаны айтылған, деп хабарлайды Qaz365.kz.
Алайда Алматы халықаралық әуежайы бұл мәліметті теріске шығарып, әуежайдың қалыпты режимде жұмыс істеп тұрғанын хабарлады.
Әуежайдың ресми мәлімдемесінде әуе кеңістігінің жабылмағаны, сондай-ақ әскери жағдай немесе әскери әрекеттер туралы ақпараттың шындыққа жанаспайтыны атап өтілді. Қосымша мәселелер бойынша уәкілетті органдарға жүгіну ұсынылды.
Онлайн-табло деректеріне сәйкес, қазіргі уақытта бірқатар рейстердің келуі мен ұшуы кешіктірілген. Атап айтқанда:
KC 641 – Алматы – Астана;
FS 7161 – Алматы – Түркістан;
FS 7052 – Астана – Алматы;
KC 852 – Астана – Алматы;
KC 594 – Пхукет – Алматы;
KC 162 – Фукуок – Алматы;
DV 5319 – Фукуок – Алматы.
Кейінірек бұл ақпаратты Қазақстан Республикасының Қорғаныс министрлігі де жоққа шығарды. Ведомствоның хабарлауынша, министрлік тарапынан әуе кеңістігіне қатысты ешқандай шектеу енгізілмеген, ал әлеуметтік желілерде тараған мәліметтердің нақты негізі жоқ.
