Қазақстанның тәуелсіздік кезеңіндегі алғашқы Бас мүфтиі, көрнекті дін қайраткері Рәтбек қажы Нысанбайұлы өмірден өтті. Қаралы хабарды Қазақстан мұсылмандары діни басқармасы растады, деп жазады Qaz365.kz.
Рәтбек қажы 1940 жылы Түркістан өңірінде туған. Ол 1990 жылы құрылған Қазақстан мұсылмандары діни басқармасының тізгінін алғаш ұстаған тұлға ретінде ел тарихында қалды. Осы кезеңде елімізде ислам дінінің дербес басқару жүйесі қалыптасып, рухани өмір қайта жанданды.
Қызметі барысында марқұм мешіттер салу, дін қызметкерлерін даярлау, діни білім беру ісін жолға қоюға айрықша еңбек сіңірді. Сонымен қатар ол қазақ тілінде діни еңбектер жазып, Құран мағыналарын түсіндіру бағытында да маңызды жұмыстар атқарды.
Рәтбек қажы Нысанбайұлының ел руханиятына қосқан үлесі мемлекет тарапынан жоғары бағаланып, «Парасат» орденімен марапатталды.
Оның дүниеден өтуі қазақстандық мұсылман қауымы үшін ғана емес, барша ел жұртшылығы үшін орны толмас қаза. Марқұмның салиқалы жолы мен рухани мұрасы халық жадында сақталады.
