Жолаушылар ғимараттан эвакуацияланды
Төтенше жағдайлар министрлігі Астана әуежайындағы өрттің шығу себептерін айтты, деп хабарлайды Qaz365.kz.
Бұған дейін Астана халықаралық әуежайының терминалында өрт шыққаны белгілі болған еді. Түтіннің салдарынан жолаушылар ғимараттан эвакуацияланды.
Төтенше жағдайлар министрлігі терминалдың электр қалқанында өрт шығып, түтін шыққанын хабарлады. Өрт 10-15 шаршы метр электр сымдарын шарпыған, бұл №2 терминалдың серверлік бөлмесінде болған. Өрт 08:24-те сөндірілді.
Астана халықаралық әуежайы ұшып келетін рейстерді қабылдауды тоқтатқан жоқ. Алайда Астана халықаралық әуежайынан ұшатын 18 рейс кешіктіріліп жатыр.
Кешіктірілген рейстердің нақты ұшу уақыты белгісіз. Жағдай тұрақталғаннан соң рейстер қалыпқа келтіріледі.
