Кінәсі дәлелденсе, ол 7 жылға дейін бас бостандығынан айырылуы мүмкін
Батыс Қазақстан облысында есепші 7 млн теңге бюджет қаражатын құмар ойынға жұмсап жіберген, деп хабарлайды Qaz365.kz.
БҚО прокуратурасының баспасөз қызметінен мәліметінше, оқиға Қаратөбе ауданында болған.
Қаратөбе ауданы прокуратурасы сотқа дейінгі тергеп-тексерудің бірыңғай тізіліміне ҚР ҚК 189-бабы 3-бөлімі 1-тармағына (ірі мөлшерде сенiп тапсырылған бөтен мүлiктi иемденiп алу немесе талан-таражға салу) сәйкес материалды тіркеп, БҚО бойынша экономикалық тергеп-тексеру департаментіне жолдады.
"Қаратөбе ауданы әкімдігі ішкі саясат бөлімі "Жастар ресурстық орталығы" КММ есепшісінің құмар ойынмен айналысқаны анықталды. Есепші басшының рұқсатынсыз және бұйрығынсыз оның ЭЦҚ-сын пайдалана отырып, 7 млн теңгеге жуық бюджет қаражатын жымқырған. Есепші жауабында өзінің және жұбайының атына ашылған жеке кәсіпкерлік субъектісіне бюджет қаржысын бірнеше рет аударып келгенін айтты. Қазіргі таңда оны экономикалық тергеп-тексеру департаменті күдікті ретінде таныды. Кінәсі дәлелденген жағдайда, оған 7 жылға дейін бас бостандығынан айыру жазасы тағайындалуы мүмкін", – деп хабарлады ведомстводан.
