Өрттің себебі анықталып жатыр
Алматыдағы «Алтын орда» базарында бірнеше нысан өртенді. Бұл жайлы видеолар әлеуметтік желіде тарады, деп хабарлайды Qaz365.kz.
Алматы қаласы ТЖД мәліметінше, базар аумағындағы бос тұрған ғимараттан от шыққан. Құтқарушылар оқиға орнына 9:20-да аттанған.
“9 қыркүйек 9 сағат 20 минутта Алматы қаласының ТЖД күш-құралдары Наурызбай ауданы Ташкент тасжолы, 17/1 мекенжайына жіберілді. Келген сәтте жұмыс істемейтін үй-жайдың шатыры өртенгені және от оның жанындағы ломбард шатырына таралғаны анықталды. Өрт орнынан 1 газ баллоны (50 л) эвакуацияланды”, – деді қалалық ТЖД баспасөз қызметі.
15 минуттың ішінде өрт оқшауланып, 09:48–де жойылды. Абырой болғанда зардап шеккендер жоқ.
Өрттің себебі анықталып жатыр.
Сауда орындарына жақын болғандықтан оқиға орнына жеке құрамның 48 құтқарушысы және 14 техника жіберілген.
