ҚР Денсаулық сақтау министрлігінің Медициналық және фармацевтикалық бақылау комитеті дәрі-дәрмек бағасының жаппай өсуі туралы қауесеттерді жоққа шығарды. 20 өңірде жүргізілген мониторинг нәтижесі бойынша, республикада дәрілік заттардың 50%-ының құны төмендегені байқалады, деп хабарлайды Qaz365.kz.
Мамандардың айтуынша, 2025 жылдың қазан айындағы бағаларды маусым айымен салыстырғанда айтарлықтай айырмашылық бар. Әсіресе, бес танымал препараттың құны 20%-дан 40%-ға дейін арзандаған. Олардың қатарында:
«Хеель»;
«Ревмоксикам»;
«Цефяпс»;
«ВАЛМАК-Н»;
«Зитмак».
Айта кетерлігі, «Цефяпс» пен «Зитмак» антибиотиктері тыныс алу жолдарының инфекцияларын емдеуде жиі қолданылады, бұл күзгі-қысқы суық тию маусымында өте өзекті.
Комитет өкілдері дәріханалардағы бағаның негізсіз өсуіне тап болған азаматтарға DariKZ мобильді қосымшасы арқылы немесе өңірлік департаменттерге хабарласуға болатынын ескертеді. Сондай-ақ, дәрі-дәрмектің бекітілген шекті бағасынан асырғаны үшін заң бойынша айыппұл қарастырылғанын тағы бір мәрте еске салды.
