Қант диабеті, гипертония, инсульттің көбеюіне әкеліп соғады
Сенатта тамақтың қауіпсіздігіне бағытталған тыңдау өткізілуде, деп хабарлайды Qaz365.kz.
Отырыста Сенат депутаты Арман Өтеғұлов қазақстандықтар қантты көп тұтынатынын мәлімдеді.
Оның айтуынша, ДДСҰ-ның мәліметіне сәйкес елімізде артық салмағы бар 6 - 9 жастағы балалардың үлесі 21%-ды құрайды. Бұл, ең алдымен, құрамында қант, май және жасанды қоспалары көп азық-түлікті пайдалануға байланысты. Сонымен қатар елімізде тұз бен қантты тұтыну көлемі күнделікті нормадан 3–4 есе жоғары.
«Сауалнамалар күн сайын қант қосылған сусындарды жасөспірімдер мен ересектердің 13–14%-ы пайдаланатынын көрсетті. Мұндай көрсеткіштер қант диабеті, гипертония, жүрек-қан тамырлары аурулары, инфаркт және инсульт сияқты ауыр дерттердің көбеюіне әкеліп соғады. Осылайша, еңбек өнімділігінің төмендеуінен және аурулардың жасырын шығындары есебінен экономика 2 трлн теңгеге дейін зиян шегуде, бұл емдеуге жұмсалатын шығыннан 6,5 есе көп», - дейді ол.
Сенатор осыған байланысты азық-түлік сапасын бақылауды күшейту, дұрыс тамақтану саясатын халық арасында, әсіресе, балалар арасында кеңінен насихаттау қажеттігін айтты. Бұл жұмысты Ауыл шаруашылығы, Денсаулық сақтау және Оқу-ағарту министрліктері бірлесіп, ақпараттық-насихаттық бағдарламаларды жүйелі түрде қолға алғаны жөн дейді ол.
