Бұл бағытта мұнай тасымалдау жылына 2,2 млн тоннаға дейін көзделген
Қазақстандық "Taraz" танкері Қашаған мұнайымен Ақтау портынан Бакуге жолға шықты, деп хабарлайды Qaz365.kz.
Бұл туралы "ҚазМұнайГаз" компаниясының баспасөз қызметі мәлімдеді.
“Жеткізу "ҚазМұнайГаз" компаниялар тобының Мемлекет басшысының отандық көмірсутектер экспортының баламалы бағыттарын дамыту жөніндегі тапсырмасын орындау шеңберінде жүзеге асырылып жатыр. Ары қарай мұнай Баку – Тбилиси – Джейхан (БТД) құбыр жүйесі арқылы Жерорта теңізіне дейін тасымалданады. Бұл қадам Транскаспий халықаралық көлік бағытын одан әрі дамытуға ықпал етеді. 2022 жылы "ҚазМұнайГаз" ҰК АҚ мен Әзербайжанның SOCAR мемлекеттік мұнай компаниясы арасында қазақстандық мұнай транзиті туралы Бас келісімге қол қойылған болатын. 2024 жылғы наурызда ҚМГ мен SOCAR арасында Әзербайжан Республикасының аумағы арқылы мұнай транзитін кезең-кезеңімен ұлғайту туралы келісім жасалды. Құжатта жеткізу көлемінің жылына 2,2 млн тоннаға дейін артуы көзделген”, – делінген ҚМГ хабарламасында.
Мұнай өнімін экспорттаушы – "ҚМГ Қашаған Б.В" компаниясы."ҚМГ Қашаған Б.В." – Солтүстік Каспий бойынша Өнім бөлісу туралы келісімдегі (ӨБК) қазақстандық қатысу үлесін басқаратын "ҚазМұнайГаз" ҰК" АҚ еншілес ұйымы. Келісімдегі компанияның үлесі 16,88% құрайды.
