Күдікті ретінде Қызылорда облысының 40 жастағы тұрғыны ұсталған
Қызылорда облысында полиция есірткі өсіретін фитозертхананың жұмысын тоқтатты, деп хабарлайды Qaz365.kz.
Бұл туралы ҚР ІІМ есірткі қылмысына қарсы іс-қимыл бөлінісі мәлімдеп отыр.
“ҚР ІІМ есірткі қылмысына қарсы іс-қимыл бөлінісі прокуратураның үйлестіруімен Қызылорда облысында жедел-іздестіру іс-шараларының нәтижесінде 40 жастағы ер адамды ұстады. Cырдария ауданының тұрғыны өзінің үйінде аса ірі мөлшерде есірткі затын сақтап, қарасора өсірумен айналысқан. Кейін оны таратуды көздеген. Тінту барысында ыдыстарға отырғызылған 86 түп қарасора, есірткі затын өсіруге арналған жабдықтар, сондай-ақ екі дана пластикалық ыдысқа салынған кептірілген марихуана тәркіленді. Жалпы 2,7 кг кептірілген марихуана және 10 кг қарасора өсімдігі анықталды. Күдікті ұсталды. Оған қатысты қылмыстық іс қозғалды”, – делінген ақпаратта.
Қазіргі таңда күдіктіге қатысты тергеу амалдары жалғасып жатыр.
