Оның пәтерінен екі мыңға жуық sim-карта тәркіленген
Киберполиция интернет алаяқтықпен айналысқан Қарағанды қаласынан шетел азамтын, Өскемен қаласының үш тұрғынын құрықтады,деп хабарлайды Qaz365.kz.
Бұл туралы ҚР ІІМ киберқылмысқа қарсы іс-қимыл департаменті мәлімдеді.
“Шығыс Қазақстан облысы полиция департаментінің киберполиция қызметкерлері ҰҚКД және прокуратурамен бірлесіп, Өскемен қаласында үш мекенжайдан 489 sim-карта орнатылған 22 sim-box құрылғысын, 452 USB-интернет модемін, 13 компьютер, 4 роутер және бір ноутбук тәркіледі. Заңсыз іс-әрекет үшін қаланың үш тұрғыны ұсталды. Оған қоса, Қарағанды қаласында шетел азаматы ұсталып, одан 128 слоты бар sim-box құрылғысы, екі мыңға жуық sim-карта, екі Wi-fi роутері және сигнал күшейткіш тәркіленді”, – деді ІІМ киберқылмысқа қарсы іс-қимыл департаментінің бастығы Жандос Сүйінбай.
Ұсталғандардың барлығы уақытша ұстау изоляторына қамалған. Қазіргі уақытта олардың қандай заңсыз әрекеттерге барғаны туралы толық тергеу жұмыстары жүргізіліп жатыр.
