Кеңгір - Ұлытау облысындағы ең ірі су қойма. Объект 1952 жылы салынған
«Қазақмыс» балансындағы Кеңгір су қоймасының гидротехникалық құрылыстары мемлекетке қайтарылды, деп хабарлайды Qaz365.kz.
Бұл туралы Ұлытау облысының прокуратурасы мәлімдеп отыр.
«Кеңгір су қоймасының гидротехникалық құрылыстары стратегиялық объектілер катарында, сондықтан мемлекет меншігінде болуы тиіс. Өз кезінде бұл объектілер қала құраушы кәсіпорын «Kazakhmys Distribution» ЖШС балансына берілген. Мүлікті қайтару үшін облыс прокуратурасы Су ресурстары министрінің атына ұсыну енгізді. Прокурорлық қадағалау актісін орындау мақсатында сыйға тарту шарты жасалып, объектіні беру актісіне қол қойылды», - делінген ақпаратта.
Құқық қорғау органдары енді объектілерді жаңғырту жөнінде одан әрі шара қабылдау мақсатында су қоймасы мен оның гидротехникалық құрылыстарына көпфакторлы зерттеу жұмысын жүргізу қажет екенін атап өтті.
Еске сала кетейік, Кеңгір - Ұлытау облысындағы ең ірі су қоймасы, сондай-ақ энергетика және ирригация саласында судың басты реттеушісі. Объект 1952 жылы салынған.
