Олардың арасындағы ақша беру онлайн-банкинг арқылы жүргізілген
Астана тұрғыны сүйіктісіне сыйлаған 5 миллион теңгені қайтаруды сот арқылы талап етті, деп хабарлайды Qaz365.kz.
Бұл туралы Астана қалалық сотының баспасөз қызметі мәлімдеді.
Істі қарау барысында сот тараптар арасында романтикалық қатынастар болғанын анықтады. Олардың арасында қарыз шарты бойынша қандай да бір міндеттемелердің бар екендігі дәлелденбеген. Онлайн-банкинг арқылы жүргізілген аударымдарда ақшаны қайтару туралы ескертпелер болмаған.
"Сот талапты қанағаттандыруға негіздердің жоқ екені туралы қорытындыға келді. Қазақстан Республикасының Азаматтық кодексінің 954-бабына сәйкес, қайырымдылық, материалдық көмек немесе сыйлық ретінде аударылған ақша негізсіз байыту ретінде қайтарылуға жатпайды", – делінген хабарламада.
Сот талап қоюды қанағаттандырудан бас тартты. Ер адам шешімге шағымдануға тырысқанымен, Астана қалалық сотының азаматтық істер жөніндегі алқасы алғашқы шешімді өзгеріссіз қалдырды. Сот шешімі заңды күшіне енген.
