Ұлытау облысы Сәтбаев қаласында кезекті рейдтік іс-шара кәсіпкерлік және ауылшаруашылығы бөлімі басшысының жетекшілігімен өтті, деп хабарлайды Qaz365.kz.
Арнайы құрылған жұмыс тобы қаладағы бірқатар сауда нысандарын аралап, әлеуметтік маңызы бар азық-түлік тауарларына қойылған бағаларды тексерді.
Мониторинг барысында дүкен иелеріне бұл тауарлардың бастапқы (сатып алу) бағасына 15 пайыздан жоғары үстеме ақы қосуға жол берілмейтіні түсіндірілді. Бұл талап ҚР Сауда және интеграция министрлігі бекіткен тәртіпке сәйкес жүргізіліп отыр.
Сауда орындарына арнайы жадынамалар таратылып, кәсіпкерлерге әлеуметтік маңызы бар азық-түлікке баға белгілеудің заңды нормалары түсіндірілді. Атап айтқанда, мұндай тауарлар тізіміне нан, күнбағыс майы, қант, күріш, макарон, картоп, сәбіз, пияз, сиыр еті, тауық еті, тұз және сүт өнімдері кіреді.
Мақсат – халықты негізсіз баға өсімінен қорғау және әлеуметтік тұрақтылықты сақтау.Рейдтік шаралар тұрақты негізде жалғасатын болады. Егер тұрғындар тарапынан заңсыз баға көтеру бойынша шағымдар түссе, тиісті шаралар қабылданатыны хабарланды.
