“Қазақ тілі — менің жүрегімнің бір бөлігі”: Алматылық Кристина тілді қалай үйренгенін айтты

Қазақ тілі үйрену мәселесі қашан да өзекті. Қоғамда тілді үйренуге деген сұраныс та жыл сайын артып келеді. Өз ниетімен тілді үйреніп алған адамдар көп. Солардың бірі - алматылық Кристина. Qaz356.kz Кристина қалайша қазақ тілін үйренгенін баяндайды.

Кристина бала кезден қазақ тілін үйренуге құштар болған. Бірақ тіл үйрену оңай болмапты. Кристинаға достары көмектесіп, ол бүгін де қазақ тілінде еркін сөйлейді.

“Қазақ тілі менің жүрегімнің бір бөлігі, менің Қазақстанымның бір бөлігі. Достарымның арқасында мен өз-өзіме сенімді бола бастадым. Мен қазір қазақ тілінде еркін сөйлеймін. Қазақ халқының мейірімі мен кең пейіліне шексіз ризамын. Қазақстанда туғаныма, тұрғаныма бақыттымын. Біздің елде бөліну емес, ең алдымен бірлік маңызды”, - дейді Кристина.

Соңғы жылдары Қазақстанда қазақ тілін үйренуге деген қызығушылық айтарлықтай артты. Бұл үрдіс мемлекеттік саясатпен қатар, қоғамдағы тілге деген көзқарастың өзгеруімен тығыз байланысты.

Қазақ тілі — Қазақстанның мемлекеттік тілі. Мемлекет тарапынан оны дамыту мен қолдану үшін түрлі бағдарламалар қабылданып, тілді меңгеруге жағдай жасалып келеді. Мемлекеттік қызметке тұру, ресми құжаттармен жұмыс істеу және қоғаммен етене араласу үшін қазақ тілін білу маңызды талапқа айналды.

Қалаларда, әсіресе жастар арасында қазақ тілінде сөйлеу сәнге айналып келеді. Әлеуметтік желілерде қазақша контент көбейіп, тіл үйренуге ынталандыратын жаңа орта қалыптасуда. Орыс тілді азаматтар мен өзге этнос өкілдері де тілді меңгеруге белсенді кірісіп жатыр.

Сонымен қатар, тіл үйрететін онлайн курстар мен мобильді қосымшалар да бұл үдерісті жеделдетіп отыр. «Soile.kz», «Tilqural» сияқты платформалар тілді үйренуді баршаға қолжетімді етті.