Ол басқарма тізгінін Берденов қала әкімінің орынбасары қызметіне келген тұста қолына алған
Шымкент қаласының сәулет және қала құрылысы басқармасының басшысы Арман Әбдешов ұсталды, деп хабарлайды Qaz365.kz.
Әбдешов бөтен мүлікті иемденді деген күдікке ілініп отыр. Қазіргі таңда істі Сыбайлас жемқорлыққа қарсы іс-қимыл агенттігі тергеп жатыр. Ол басқарма тізгінін биыл ақпанда, Руслан Берденов қала әкімінің орынбасары қызметіне келген тұста қолына алған.
Айта кетейік, Әбдешовтің ұсталған уақыты қала әкімінің орынбасарына жасалған қастандық ісімен қатар келіп отыр. Бұл іс бойынша «Тұрғын үй Шымкент» компаниясының директоры Ернар Жиембай айыпталуда. Қазір аталған компанияда аудит жүргізілуде.
Бұған дейін сотта құрылыс басқармасының қызметкері Берденов бірнеше рет жиналыс өткізіп, алдағы тексерістер туралы – Антикор мен Экономикалық тергеп-тексеру департаментінен болатын бақылау жайында ескерткенін айтқан.
Аталған оқиғалардың өзара байланысы бар-жоғы әзірге белгісіз.
