Алматы қаласының жас аудандарының бірі саналатын Наурызбай ауданы соңғы жылдары айтарлықтай экономикалық белсенділік байқатып келеді. 2025 жылдың он айындағы әлеуметтік-экономикалық көрсеткіштер ауданның даму қарқынының тұрақтанғанын ғана емес, келешектегі әлеуетінің де жоғары екенін көрсетеді. Аудан әкімі Назира Тоғызбаеваның деректеріне сүйенсек, ірі жобалар мен шағын кәсіпкерліктің өсімі аудан экономикасын алға сүйреп, оның қалалық дамудағы рөлін күшейтіп отыр, деп хабарлайды Qaz365.kz.
Ең алдымен, өңдеу өнеркәсібіндегі алға жылжуды атап өткен жөн. Биылғы қаңтар-қыркүйек айларында өндіріс көлемі 13,8 млрд теңгеге жетіп, өткен жылмен салыстырғанда 1,2 пайыздық өсім көрсеткен. Бұл жоғары қарқын болмаса да, жаңа өндіріс қуаттарының қалыптасып келе жатқанын білдіреді. Аудан негізінен тұрғын үй құрылысы мен қызмет көрсету бағытында дамып келе жатқандықтан, өндірістік сектордың тұрақты өсім көрсетуі экономикалық құрылымның біртіндеп теңгерімді бола бастағанын аңғартады.
Инвестиция тарту – Наурызбай ауданының негізгі табысының бірі. Биыл аудан экономикасына 145,2 млрд теңге инвестиция құйылып, бұл өткен жылдың сәйкес кезеңінен 49 пайызға артық. Мұндай айтарлықтай өсім ауданда құрылыс қарқынының жоғары болуымен, бизнес жүргізуге қолайлы инфрақұрылым қалыптасуымен және инвесторларға арналған жаңа мүмкіндіктердің кеңеюімен байланысты. Жыл соңына дейін инвестиция көлемін 197 млрд теңгеге жеткізу жоспары бар, оның 150 млрд теңгесі құрылыс секторына, қалған бөлігі сауда, өндіріс және түрлі қызмет салаларына бағытталмақ.
