Мәжіліс депутаты Айдос Сарым әлеуметтік желілерде Каспий құбыр консорциумының (КТК) нысандарына жасалған шабуылды қолдаған жазбаларға қатысты құқықтық баға беруді талап етті. Ол бұл жөнінде Бас прокуратура мен Мәдениет және ақпарат министрлігіне ресми өтініш жолдады, деп хабарлайды Qaz365.kz.
Депутаттың айтуынша, КТК арқылы жыл сайын шамамен 30 миллиард доллар көлемінде экспорттық кіріс өтеді, оның үштен бірі Ұлттық қорға түседі және елдің салық түсімдерінің елеулі бөлігін құрайды.
«Әлеуметтік желілерде ел азаматтарының кейбірі стратегиялық маңызы бар инфрақұрылым нысандарына жасалған шабуылдарды ашық қолдап жатыр. Бұл – сөз бостандығының шегінен шығып, мемлекет пен азаматтарға зиян келтіретін әрекет», – деді Сарым.
Оның сөзінше, мұндай шабуылдарды қолдау ел экономикасына айтарлықтай қауіп төндіреді, себебі КТК жұмысының ұзаққа тоқтауы ай сайын 500 миллион доллар шығын әкелуі мүмкін.
Айдос Сарым құқық қорғау органдарын мұндай жазбалардың авторларының әрекетін Қылмыстық кодекстегі терроризмді насихаттау және мемлекеттік опасыздық баптары бойынша қарастыруға шақырды.
«Мұндай мәлімдемелер тек экономикалық емес, саяси қауіп-қатер тудырады. Сондықтан оларға жедел құқықтық баға берілуі тиіс», – деді депутат.
