Қазақстанда 16 қаңтардан бастап жасанды интеллект туралы заң күшіне енеді. Құжатқа сәйкес, жасанды интеллектінің көмегімен жасалған контентті міндетті түрде машинамен оқылатын таңбалаумен белгілеу талап етіледі. Бұл талапты орындамағандарға әкімшілік жауапкершілік қарастырылған, деп хабарлайды Qaz365.kz.
Норма Әкімшілік құқық бұзушылық туралы кодекске енгізілген. Айыппұл мөлшері құқық бұзушының мәртебесіне байланысты белгіленеді: жеке тұлғалар үшін – 15 айлық есептік көрсеткіштен (64 875 тг), ірі бизнес өкілдері үшін – 100 айлық есептік көрсеткішке (432 500 тг) дейін. Қайтадан заң бұзылған жағдайда айыппұл көлемі екі есе ұлғаяды. Ал ірі компаниялар үшін жүйелі түрде талапты орындамау жасанды интеллект жүйесінің жұмысын уақытша тоқтатуға немесе толық тыйым салуға дейінгі қатаң шараларға әкелуі мүмкін.
Заңда авторлық құқық мәселелері де нақтыланған. Жасанды интеллект арқылы жасалған контент тек адамның шығармашылық үлесі болған жағдайда ғана авторлық құқықпен қорғалады. Ал авторлық туындыларды жасанды интеллектіні оқыту үшін пайдалану тек құқық иесі тарапынан машинамен оқылатын тыйым болмаған кезде ғана рұқсат етіледі.
