Air Astana әуе компаниясы елордалық жолаушылар үшін жағымды жаңалықты жария етті. 2 маусымнан бастап Астана – Гуанчжоу – Астана бағыты бойынша тікелей рейстер іске қосылады, деп хабарлайды Qaz365.kz.
Енді қазақстандықтар елордадан Қытайдың ірі өнеркәсіптік және мәдени орталығы – Гуанчжоу қаласына тікелей ұша алады. Жаңа бағыт екі ел арасындағы іскерлік және туристік байланыстарды нығайтуға бағытталған.
Ұшу сапарлары аптасына екі рет — сейсенбі және бейсенбі күндері жайлы әрі заманауи Airbus A321LR лайнерімен жүзеге асырылады.
Астана – Гуанчжоу: Ұшу уақыты – 18:45, қону – 04:30 (+1 күн). Сапар ұзақтығы – 6 сағат 45 минут.
Гуанчжоу – Астана: Ұшу уақыты – 05:45, қону – 10:10. Сапар ұзақтығы – 7 сағат 25 минут.
Екі тарапқа арналған билеттердің минималды бағасы:
Эконом-класс: 251 333 теңгеден бастап;
Бизнес-класс: 835 020 теңгеден бастап.
Бұл жаңа бағыт былтырғы наурыздан бері сәтті жұмыс істеп тұрған Алматы – Гуанчжоу (аптасына 4 рет) рейсін толықтыра түспек. Осылайша, әуе компаниясы Гуанчжоуға аптасына барлығы 6 рейс орындайтын болады. Бұдан бөлек, Air Astana Бейжің, Шанхай және Үрімжі қалаларына да тұрақты ұшуларын жалғастыруда.
Ескерту: Қазақстан азаматтары Қытай аумағында 30 күнге дейін визасыз жүре алады.
