Мәжілістің жалпы отырысында депутат Ерлан Саиров «QazaqGaz» ұлттық компаниясын қатаң сынға алып, оның штатын қысқартуды және үнемделген қаражатты өңірлерді газдандыруға бағыттауды талап етті, деп хабарлайды Qaz365.kz.
«Халқымыз әлі күнге дейін тезек жағып отыр»
Газмен жабдықтау мәселелеріне арналған заң жобасын талқылау кезінде депутат еліміздің бірқатар өңіріндегі жағдайдың мәз емес екенін ашып айтты.
«XXI ғасырда Солтүстік Қазақстан, Павлодар, Абай және Шығыс Қазақстан облыстарының тұрғындары әлі күнге дейін үйлерін тезек пен көмірмен жылытып отыр. Бұл — масқара жағдай», — деді Ерлан Саиров.
Тиімсіз штат пен Президент сыны
Депутаттың мәліметінше, компанияда 10 мыңнан астам адам жұмыс істейді, бірақ олардың тиімділігі күмән тудырады. Ол Мемлекет басшысы Қасым-Жомарт Тоқаевтың бұған дейін «Самұрық-Қазына» қоры мен ұлттық компаниялардағы «ештеңе істемейтін» қызметкерлер туралы айтқан сынын еске салды.
«Тек қана кофе ішіп отырғандарды жұмыстан шығарып, олардың ақшасын ауылдарға газ тартуға жұмсау керек. Бұл — халықтың ақшасы және әрбір қадам адамдардың әл-ауқатын жақсартуға бағытталуы тиіс», — деп мәлімдеді депутат.
Министрліктің жауабы мен депутаттың наразылығы
Энергетика вице-министрі Қайырхан Тұтқышбаев ведомствоның қазіргі уақытта ресурстық базаны кеңейту, геологиялық жұмыстар және зауыттар салумен айналысып жатқанын жеткізді. Алайда Ерлан Саиров бұл жауапқа қанағаттанбай, ауылдық жерлерді газдандыру мәселесі әлі де өте өткір болып қалып отырғанын баса айтты.
