Арестті шешу үшін азаматтардан шоттың мақсатын растайтын құжаттар талап етіледі
Қазақстанда жалақы, алимент және мемлекеттік жәрдемақы түсетін банк шоттарынан арестті алу процесі басталды. Әділет министрлігі Жеке сот орындаушыларының республикалық палатасымен бірлесіп, арнайы акция бастады. Шара 2026 жылдың 6-30 сәуірі аралығында өтеді, деп хабарлайды Qaz365.kz.
Жаңа ережеге сәйкес, азаматтар шоттарын бұғаттан босату үшін Adilet.gov мобильді қосымшасына тіркеліп, сол жерден жеке сот орындаушысына өтініш жолдауы қажет. Бұл жеңілдік тек жалақы, зейнетақы, алимент және жәрдемақы түсетін арнайы шоттарға ғана қатысты қолданылады.
Арестті шешу үшін азаматтардан шоттың мақсатын растайтын құжаттар талап етіледі. Мысалы, жұмыс орнынан жалақы шоты туралы анықтама немесе Мемлекеттік зейнетақы төлеу орталығынан (МЗТО) шоттың зейнетақыға арналғанын растайтын құжат ұсынуы тиіс. Тиісті құжаттар қосымша арқылы онлайн беріледі.
Әділет министрлігі шоттан аресттің алынуы борышкерді қарыздан босатпайтынын ерекше атап өтті. Азаматтар атқарушылық құжаттар бойынша берешектерді, айыппұлдар мен өзге де міндетті төлемдерді өтеу міндеттемесінен босатылмайды. Бұл шара тек халықтың әлеуметтік маңызды төлемдерін кедергісіз алуына жағдай жасауды көздейді.
