Жас жұбайлардың екеуі де 18 жаста.
Әлеуметтік желіде Қазақстанның тұңғыш президенті Нұрсұлтан Назарбаевтың ресми некеден тумаған ұлы Тауман Энергетика министрінің қызына үйленді деген ақпарат тарады. Осыған байланысты министрліктің баспасөз қызметі жауап берді, деп хабарлайды Qaz365.kz.
Желідегі тараған видеоға сүйенсек, Нұрсұлтан Назарбаевтың ұлы Тауман жаңадан тағайындалған министр Алмасадам Сәтқалиевтің қызы Анаделя Майдановамен неке қиған. Жас жұбайлардың екеуі де 2005 жылы дүниеге келген.
Бірақ Энергетика министрлігінің баспасөз қызметі бұл ақпараттың жалған екенін хабарлап отыр.
“Әлеуметтік желіде тексерілмеген, шындыққа жанаспайтын ақпарат тарап кетті. Энергетика министрінің қызы видеода тарағандай, өзінің сыныптасымен некеде тұрмайды. Сонымен қатар Алмасадам Сәтқалиевтің тұңғыш президентке туыстық қатысы жоқ”, - делінген хабарламада.
