Ол бұған дейін екі рет көлікті мас күйінде басқарған кезде ұсталған
Алматыда мас күйде көлік жүргізгені үшін екі рет жауапқа тартылған жүргізуші тағы ұсталды, деп хабарлайды Qaz365.kz тілшісі.
Осыдан бірнеше күн бұрын қала полицейлері экологиялық постта Алматы облысының 36 жастағы тұрғынын тоқтатқан.
«Тoyota көлігі жүргізушісінің әрекеті патрульдік полиция қызметкерлеріне күдікті болып көрінді. Медициналық сараптама оның есірткі қолданғанын анықтады. Жүргізуші көлік құралын жүргізуден шеттетілді. Аталған дерек бойынша ҚР ҚК-нің 346-бабы 1-бөлігіне сәйкес қылмыстық іс тіркелді. Ол уақытша ұстау изоляторына қамалды», - деді Алматы қалалық ПД анықтау басқармасының бастығы Олжас Шәріпов.
Белгілі болғандай, жүргізуші бұған дейін екі рет көлікті мас күйінде басқарған кезде ұсталған. Бірінші жайт 2020 жылдың наурыз айында Алматы облысы Райымбек ауданында болған. Сол кезде ол сот шешімімен 7 жыл мерзімге көлік құралын басқару құқығынан айырылған.
Алайда, бір жылдан кейін ол тағы да мас күйде көлік жүргізеді. Сол кезде сот оны ҚР ҚК-нің 346-бабы және ҚР ҚК-нің 380-бабы 1-бөлігінде көзделген қылмыстық құқық бұзушылықтарды жасағаны үшін екі жарым жылға бас бостандығын шектеу жазасына кескен.
