ҚР Сыртқы істер министрлігінің ресми өкілі Айбек Смадияров Қытаймен өзара визасыз режим туралы келісім жөнінде әлеуметтік желіде жазба жариялады, деп хабарлайды Qaz365.kz.
Айбек Смадияров осыдан бір ай бұрын бұқаралық ақпарат құралдарының өкілдеріне Қазақстан Қытаймен өзара визасыз режим туралы келісімге қол қою үшін тиісті жұмыс жүргізіп жатқанын жариялаған еді. Оның сөзінше, бұл келісім екі ел арасындағы қарым-қатынастардың дамуына, азаматтар арасындағы байланыстарға, сауда саттықты кеңейтуге айтарлықтай қолдау болады.
«Оны барлығымыз түсініп отырмыз. Қазіргі геосаяси жағдайда Қазақстан үшін неғұрлым көп елдермен тығыз қатынас орнату ұтымды екеніне күмән жоқ. Өздеріңіз білетіндей, біз сыртқы саясатта көпвекторлы бағытты таңдап, осы күнге дейін оны табысты жүзеге асырып келеміз. Алайда әлеуметтік желілерде Қазақстан мен Қытай арасындағы қатынасты жаңа деңгейге шығаратын құжатқа қол қоюға қарсы бір топ белсенді қалың жұртшылыққа қате ақпаратты таратып жатыр. Осыған орай, Сыртқы істер министрлігінің атынан жоғарыда айтылған келісімге қатысты қысқаша тағы да қосымша ақпарат берейін», – дейді ол.
Айбек Смадияров Қазақстан бұл келісімге қол қойса, Қытай азаматтары елімізге қаптап кіреді деген пікір шындыққа жанаспайтынын атап өтеді. Себебі былтыр шілде айынан бастап Қазақстан Иран, Үндістан және Қытайдың азаматтарына елімізге 14 күнге дейін визасыз кіруге рұқсат берген.
«Аталған елдердің, әсіресе Қытай азаматтарының Қазақстан қалаларының көшелерінде қаптап жүргенін көріп отырған жоқпыз. Бұл шара республикамыздың инвестициялық климатын және туристік әлеуетін арттыру, сондай-ақ іскерлік байланыстарды дамыту үшін жасалған. Экономикалық тұрғыдан бұл бастама өзінің оң нәтижесін беруде», – дейді ол.
Айбек Смадияров сонымен қатар Қазақстан мен Қытай арасындағы визасыз режим, ең алдымен, Қазақстан азаматтарының көрші мемлекетке баруына барынша қолайлы жағдай туғызатынын атап өтеді. Егер бұрын тек Қытай азаматтары бізге визасыз 14 күнге кіре алатын болса, бұл келісімнен кейін олар да, қазақстандықтар да бір біріне 30 күнге дейін визасыз бара алады. Мысалы, Қазақстан азаматтары бүгінде визасыз, лезде Түркия мен Біріккен Араб Әмірліктеріне қыдырып барып қайтып жатыр. Енді дәл солай Қытайға да бір ғана паспортпен барып келуге болады.
«Визасыз Қазақстанға келген Қытай азаматтары елімізде қалып қояды, жұмыс орындарымызды тартып алады деген пікірлер жаңсақ. Өйткені визасыз режим тек туристік және іскерлік сапарларға арналады және жұмыс істеуге рұқсат бермейді. Қызмет етуге бөлек арнайы жұмыс визасын алдын ала рәсімдеу қажет. Бұрын Қытайға бару үшін визаны ашу, консулдық алымды төлеу, ұзақ кезекте тұру (кейде 2-3 айға дейін), виза рәсімдейтін арнайы компаниялардың қызметіне қомақты ақша төлеу керек еді. Ал визасыз режим енгізілгеннен кейін бұл шаралардың ешбірі қажет болмайды», – дейді ҚР СІМ ресми өкілі.
Визасыз режим қай елде болсын шетелден келетін туристердің санын арттыруға бағытталған дейді Смадияров. Бұл экономикаға оң әсер ететінін, өйткені елге келген турист міндетті түрде қонақ үйде тұрып, кафе мен мейрамханаларда тамақтанатынын, көлік қолданады, жалпы айтқанда елде біраз ақша жұмсайтынын айтады. Ал қытайлық туристер әлемде қалталы туристер санына жатады.
«Қорыта келгенде, визасыз режимнен қауіп жоқ. Біз бұдан пайда көрмесек, ұтылмайтынымыз анық. Әлемнің екінші экономикасы саналатын Қытаймен өзара тиімді саясатты жүргізу еліміздің ұлттық мүддесіне толық сай келеді», – дейді Айбек Смадияров.
