Ол журналистердің С.Күдебаевтың елден ізін суытуы жайлы сұрақтарына жауап берді
ҚР ҰҚК төрағасының орынбасары – Шекара қызметінің директоры, генерал-майор Ерлан Алдажұманов журналистердің С.Күдебаевтың елден ізін суытуы жайлы сұрақтарына жауап берді, деп хабарлайды Qaz365.kz тілшісі.
«Қылмыстық істің аяқталғанын күтейік, содан кейін бәрі анық болады. Шешім шықсын, содан кейін қайда, неге, неліктен және қалай екенін анықтаймыз», - деді Шекара қызметінің директоры Ерлан Алдажұманов.
Шендіні қаумалаған журналистер Күдебаевтың шекара асуы сабақ болуы керек екенін айтып, мұндай оқиғалардың алдын алу үшін қандай шаралардың қолға алынғанын білгісі келді.
«Айналысып жатырмыз, мен сізге жаңа ғана жауап бердім, бәрі жоспарлы түрде жүреді. Жыл сайын тау, шөл мен құм т.б. барлық жерде өзіміздің жоспарымыз бар», – деді Шекара қызметінің директоры.
Сотталған азаматарды бір колониядан екіншісіне ауыстыру кезіндегі қауіпсіздік мәселесі де қалыс қалмады.
«Қандай колония туралы айтып тұрсыз? Олар шекаралас аудандарда орналасқан ба? Қажет болса, онда біз шекарада 365 күн бойы күшейту жұмыстарын қолға аламыз. Қазір қалыпты режимде 365 күн күзетеміз. Барлығын неліктен күшейтуіміз керек, біз оны тиісті талап бойынша күзетеміз», - деді Алдажұманов.
