Тоқаев Қатон-Қарағай, Марқакөл және Мақаншы аудандарын қалпына келтіруге тапсырма берді
Мемлекет басшысы Қасым-Жомарт Тоқаев шекараға жақын үш ауданды қалпына келтіру туралы ұсынысты қолдағанын мәлімдеді, деп хабарлайды Qaz365.kz.
«Аманат» партиясы бірқатар шекаралас ауданды қалпына келтіру туралы бастама көтергенін білесіздер. Үкімет менің тапсырмаммен бұл мәселені пысықтады. Соған сәйкес Қатон-Қарағай, Марқакөл және Мақаншы аудандарын қалпына келтіру туралы негізгі шешімді қабылдадым. Әрине, бұған арнайы дайындық керек. Қажетті есеп-қисабын жасап, қаражатымызға, бюджеттің мүмкіндігіне қарауымыз керек», - деді Президент.
Ол тиісті жұмыстың бәрін биыл аяқтап, алдағы екі жылдың ішінде осы үш ауданды қалпына келтіре бастаймыз деп айтты.
«Бұл – ұлттық қауіпсіздікті қамтамасыз ету тұрғысынан қарасақ та, өте маңызды мәселе. Осы мәселені көпке созбай, шешуіміз қажет. Жалпы, аудандарды қосу немесе тарату ондағы жұрттың күнделікті өміріне тікелей әсер етеді. Шешім қабылдаған кезде халық саны, экономикалық әлеуеті, инфрақұрылымы түгел ескерілуге тиіс», - деді Қасым-Жомарт Тоқаев.
Осы орайда мемлекет басшысы былтыр президент сайлауынан кейін ең алдымен ауылды дамыту мәселесіне арналған жарлыққа қол қойғанын еске салды. Үкімет алдағы 5 жылда ауылды дамытуға айрықша күш салатын болады.
«Ауыл – қазақтың алтын бесігі. Елге еңбегі сіңген көрнекті тұлғалардың басым көпшілігі ауылдан шыққан. Біз елімізді өркендетеміз десек, ауыл мектебінің жай-күйін жақсартуды мықтап қолға алуымыз керек. Бұл жұмысты «Ауыл – ел бесігі» арнайы жобасының аясында кешенді түрде жүзеге асыру қажет. Яғни, мектеп салу, күрделі жөндеу жүргізу және оны жабдықтау жұмысын тиісті деңгейде атқару маңызды», - деді Президент.
