Мас күйінде көлік жүргізген экс-депутатқа қатысты сот үкім шығарды
Ақтөбеде мас күйде көлік басқарған экс-депутат Сәния Мұратоваға қатысты сот үкімі шықты, деп хабарлайды Qaz365.kz.
Ақтөбе қалалық әкімшілік құқық бұзушылық істер жөніндегі мамандандырылған ауданаралық сотының мәліметінше, оқиға 5 қазанда болған. Байшева көшесінде Lexus көлігін жүргізген 53 жастағы әйел жеңіл масаң күйде болғаны анықталған.
«Сот қаулысымен Мұратова ҚР Әкімшілік құқық бұзушылық кодексінің 608-бабының 1-бөлігінде көзделген әкімшілік құқық бұзушылықты жасағаны үшін кінәлі деп танылды. Оған 15 тәулікке әкімшілік қамауға алу түріндегі жаза тағайындалып, 7 жыл мерзімге көлік жүргізуші куәлігінен айырылды», – деді ведомствода.
Сот үкімі әлі заңды күшіне енген жоқ.
Экс-депутат мәслихаттың әлеуметтік-мәдени даму және жастар жөніндегі тұрақты комиссиясының мүшесі болды. Сондай-ақ ол фитнес орталықты басқарған.
Жанжалдан кейін депутаттық өкілеттігін тоқтататыны туралы мәлімдеме жасаған.
