Құтқарушылар 10 кеншіні іздеу жұмыстарын жалғастырып жатыр
Қарағанды облысындағы Костенко атындағы шахтада орын алған жарылыстан қаза тапқан кеншілердің саны 36-ға жетті. Бұл туралы ҚР ТЖМ баспасөз қызметі мәлім етті, деп хабарлайды Qaz365.kz.
ТЖ министрлігінің хабарлауынша, қазіргі уақытта 36 адамның денесі табылды, 10 кеншіні іздеу жалғасуда.
«Авариялық-құтқару жұмыстарына «Кәсіби әскерилендірілген авариялық-құтқару қызметтерінің республикалық орталық штабы» ЖШС Қарағанды филиалының тау-кен құтқарушыларының 10 бөлімшесі жұмылдырылды. Газ жағдайын бақылау жалғасуда. Кеншілердің барлығын таппайынша, іздеу үзіліссіз жалғаса береді», – деді Қарағанды облыстық төтенше жағдай департаментінің бастығы Мұрат Қатпанов.
Костенко шахтасында туыстарын күтіп отырғандар бар. Дәрігер жағдайы нашарлаған кеншілердің туыстарының бірін алып кетті.
Еске сала кетейік, кеше, 28 қазанда «АрселорМиттал Теміртауға» қарасты Костенко шахтасында апат болып, кеншілер қаза тапқан болатын.
Қайғылы оқиғаға байланысты Мемлекет басшысы Қарағанды облысына барып, қаза тапқан кеншілердің отбасыларымен кездесіп, көңіл айтты. Олар Президентке жанайқайын жеткізді.
Президент Үкіметке «АрселорМиттал Теміртаумен» инвестициялық ынтымақтастықты тоқтату туралы тапсырма берді.
Сонымен қатар, Мемлекет басшысы 29 қазан Жалпыұлттық аза тұту күні деп жариялады.
