Антикордың ресми өкілі жауап берді
Бүгін Сыбайлас жемқорлыққа қарсы іс-қимыл агенттігінің ресми өкілі Арман Тілеукенов өткізген баспасөз брифингінде тілшілердің бірі «ӨКМ операторына» қатысты сот отырыстарына Әлия Назарбаеваның неге шақырылмағанын сұрады, деп хабарлайды Qaz365.kz.
17 қараша күні «ӨКМ операторы» ісі бойынша экс-Президент Нұрсұлтан Назарбаевтың кіші қызы Әлия Назарбаеваның бұрынғы үй қызметшісі Шынар Мұқтароваға қатысты сот шешімі шығып, ол 7 жылға шартты түрде сотталған болатын. Ол 2018 жылы утилизация алымы жинағынан 920 млн теңге мөлшерінде заңсыз дивиденд алды деп айыпталды.
Оның алдында шілдеде Экология вице-министрі Ахметжан Пірімқұлов, «Оператор РОП» ЖШС басқарма төрағасы Медет Құмарғалиев, бас директор Светлана Короткенко және қаржы директоры Рустем Темірбекке қатысты сот шешімі шыққан. Олар қамауға алынды.
Ал “ӨКМ операторының” құрылтайшысы болды делінген Әлия Назарбаеваның өзі ешқашан сот процесіне шақырылған емес.
«Тергеу жүргізу барысында қылмыстық процеске қатысушылардың ешқайсысы бұл адамның «ӨКМ операторы» ісіне қатысын айтқан жоқ. Сот процесі кезінде, мүмкін, айтқан шығар. Бірақ тергеу барысында өзге фамилиялар аталмады», – деді Антикордың ресми өкілі Арман Тілеукенов.
