Бородулихадағы ойдым жолды жөндеген азамат кім екені анықталды
Биыл маусымда Семейде орман өртенгенде жергілікті шенеуніктердің Президент келеді деп, Бородулихадағы ойдым-ойдым жолдарды асығыс жөндеген видеосы тараған болатын. Абай облысының әкімі Нұрлан Ұранхаев ол кім екенін айтты, деп хабарлайды Qaz365.kz.
«Бородулиха ауданының бір жанашыр инвесторы екен. Мен оны таптым. «Мұны не үшін салып жатырсыз?» деп сұрағанмын. Сонда Қазақстан халқы жаппай біздің ауданға көмектесіп жатқанын білесіз, сол кезде қалыспай жолды жөндеп қоймақшы болдым дейді. Ешкім тапсырма бермеген. Ол шешімді өзі қабылдаған», – дейді Нұрлан Ұранхаев.
Президент Қасым-Жомарт Тоқаев сол кезде мұны естіп, кінәлілер жазасын алатынын айтқан еді.
«Мен келеді деп аяқ астынан жол жөндей бастау дұрыс емес. Бұл – мүлдем масқара жағдай. Мен бұл туралы оқыдым, білемін. Кінәлілер жазаланады», – деді ол.
Еске салайық, биыл маусымда «Семей орманы» резерватында болған алапат өрт салдарынан 15 адам қаза тауып, 60 мың гектар орман өртеніп кеткен еді.
