2024 жылы ең төменгі жалақы мен зейнетақы қанша болады

Президент Қасым-Жомарт Тоқаев «2024-2026 жылдарға арналған республикалық бюджет туралы» заңға қол қойды, деп хабарлайды Qaz365.kz.

Заңға сәйкес 2024 жылдың 1 қаңтарынан бастап:

• ең төменгі жалақы (ЕТЖ) – 85 000 теңге;
• айлық есептік көрсеткіш (АЕК) – 3 692 теңге;
• мемлекеттік базалық зейнетақы төлемінің ең төменгі мөлшері – 28 215 теңге;
• зейнетақының ең төменгі мөлшері – 57 853 теңге;
• базалық әлеуметтік төлемдердің мөлшерін есептеуге арналған ең төменгі күнкөріс минимумы 43407 теңге болып бекітілді.

Жасы бойынша зейнетақы төлемдеріне және еңбек еткен жылдары үшін зейнетақы төлемдеріне бөлінген қаражат осы аталған сомалардың 2024 жылғы 1 қаңтардан бастап 9%-ға ұлғаюын ескере отырып қарастырылған.

Сондай-ақ Мемлекет басшысы «Қазақстан Республикасының Ұлттық қорынан 2024-2026 жылдарға арналған кепілдендірілген трансферт туралы» заңға қол қойды. Бұған дейін заң жобасы қоғамдық талқылауда болды.

Айта кетейік, 2023 жылдан 2027 жылға дейін ең төменгі базалық зейнетақының мөлшерін ең төменгі күнкөріс деңгейінің 54-тен 70%-ға, ал ең жоғары мөлшерін 100-ден 120%-ға дейін кезең-кезеңімен ұлғайтылады.

2023 жылдың басында базалық зейнетақының ең төменгі мөлшері 54%-дан 60%-ға дейін өсті.

Бес жыл ішінде базалық зейнетақының мөлшері орта есеппен 50%-ға дейін өседі. Бұл Қазақстандағы барлық зейнеткерді (қазіргі уақытта 2,3 миллион адам) қамтиды.