Лифтіде қалған адамға ауа жетпеген
Астаналық құтқарушылар лифт ішінде қалып қойған 3 адамды құтқарған, деп хабарлайды, Qaz365.kz.
ТЖМ мәліметінше, олар әуелі лифтіге жауапты компанияның қолдау қызметіне хабарласқан. Бірақ ауа тарылып бір адам өзін жайсыз сезіне бастағандықтан, 112 қызметін шақырған. Құтқарушылар гидравликалық құралдармен лифт есігін ашқан.
«Сарыарқа ауданындағы көп қабатты тұрғын үйлерінің бірінде 3 ересек адам лифт ішінде тұрып қалды. Лифтке жауапты қызметке жүгініп, күтіп тұрған кезде іштегі әйелге ауа тар болып, өзін жайсыз сезіне бастаған соң, 112 нөміріне қоңырау шалды. Шақыру орнына келген құтқарушылар гидравликалық құралдардың көмегімен лифт есігін ашып, адамдарға шығуға көмектесті. Олар медициналық көмекке мұқтаж емес» – делінген хабарламада.
Айта кетейік, егер лифт ішінде тұрып қалсаңыз, құтқарушылардың арнайы төмендегідей ережелері бар:
1. Өзіңіз алаңдамаңыз және көршілеріңізді тыныштандырыңыз;
2. Диспетчерге хабарласыңыз;
3. Барлық түймелерді қатарынан баспаңыз;
4. Лифт есіктерін өзіңіз ашуға тырыспаңыз;
5. Барлық сыртқы байланыс арналарын пайдаланыңыз.
