Депутат Қазақстандағы зейнетақының көлемі аз екеніне келісетінін айтты
Мәжіліс депутаты Айдос Сарым Еңбек және халықты әлеуметтік қорғау министрлігінің зейнеткерлерге қатысты ұсынысын сынға алға болатын. Депутат кулуарда жағдайды түсіндіріп, өзінің өле-өлгенше жұмыс істей беретінін айтты, деп хабарлайды Qaz365.kz.
«Барлығы заңмен реттеледі ғой. Болашақта да мұндай бастаманың қажеті жоқ. Санмен, дерекпен бәрін келтірдік. Біздің елде маман дефициті бар. Жұмыс орындары көп, бірақ оған иланып баратын жастар аз. Басқа жұмыстарды таңдағысы келіп тұрады. Ауылдарда, шағын қалаларда 60 жастан асқан мұғалім, дәрігерлеріміз жүр. Олар өздері-ақ кеткісі келеді. Немерелерін бағып, аяқтарын жылы суға салып отырғанды қалайды. Алайда мектеп директорларының өздері жібермейді. Өйткені маман тапшы», – дейді Айдос Сарым.
Депутат Қазақстандағы зейнетақының көлемі аз екеніне келісетінін айтты. Тек Қазақстанда ғана емес, өзге әлем елдерінде де солай деп отыр.
«Барлығы ЖІӨ үлесіне байланысты ғой. Әлемнің барлық кемпірлері курортта жүр деп айта алмаймын. Скандинавия елдері, Испания, Италияда демалып жүргендерін көреміз. Барлығы экономикаға байланысты. Менің де анамның жақсы зейнетақы алып, жақсы демалып жүргенін қалаймын. Зейнетақы көлемінің жоғары болуы үшін жақсы ақша тауып, еңбек етуіміз керек. Бастысы, ел экономикасы көтерілуі тиіс. Басқа ештеңе істей алмаймыз», – дейді ол.
Айдос Сарым өзі демалмай жұмыс істей беретінін де айтып қалды.
«Мен зейнетке шықпаймын. 63-тен де жұмыс істеймін. Өліп өлгенше жұмыс істей беремін», – дейді депутат.
