Олардың әрекетінде қылмыстық құрам бар ма
Шерзат Болаттың туыстарының құқығын қорғайтын адвокат Карина Көшербаева кеше осы іске қатысы бар делінген екі әйелдің куәгер болып кеткенін айтқан еді. Осыған қатысты бұрынғы ішкі министрінің орынбасары, қазіргі сенатор Марат Қожаев пікір білдірді, деп хабарлайды Qaz365.kz.
Бұл жерде қылмыс құрамын айқындау үшін төрт компонент есепке алынады. Істің объективті және субъективті жағы қаралады. Солардың бәрі расталса ғана бәрі шешіледі. Заң жайдан-жай қарамайды ғой. Журналистер қалады екен деп, біз оларды бірден жазалай кетпейміз. Бәрі заңнамаға сай қаралады. Егер сол Шерзат ісіндегі екі әйелдің әрекетінде төрт компонент айқындалмаса, тіпті біреуі мәселен, «арам пиғылы болмаса» істе қылмыстық құқықбұзушылық құрамы болмады деп қаралады, – дейді Марат Қожаев.
Бұған дейін адвокат Карина Көшербаева Шерзат Болат ісіндегі екі әйел 29 қарашадағы прокуратураның жауабы бойынша тек куәгер болып шыққанын айтты. Адвокат кешегі жағдайдың ушығып кетуінің бір себебін осыдан көреді. Қаржаубай тарапы енді жоғары инстанцияға шағымданып, екі әйелдің құқықтық статусын өзгертуді көздеп отыр.
