Журналист одан үнемі тілшілердің сұрағына неге жауап бермей кетіп қалатынын сұраған
Бүгін Алматы қаласының әкімі Ерболат Досаев Орталық коммуникациялар қызметі алаңында өзін «жабық әкім» деп сынағандарға жауап берді, деп хабарлайды Qaz365.kz.
«Тәуелсіздік күнінде Алматыда Тәуелсіздік монументіне гүл шоқтарын қойдыңыз. Бірақ тілшілер сұрақ қойғысы келгенде тыңдамай кетіп қалдыңыз. Неге үнемі тілшілердің сауалына жауа бермейсіз?», – деп сұрады тілші.
Әкім тілшілерден қашпайтынын, ашық екенін айтты.
«16 желтоқсан әрбір қазақстандық үшін маңызды мереке. Бұл біздің Тәуелсіздік күніміз. Шынын айтқанда, гүл шоқтарын қойған соң, өз жұмысыма кетіп қалдым. Мен бірақ журналистерден қашып жүрген жоқпын. Осы жылы Алматыда халықпен 32 кездесу өткіздім. Одан бөлек іс-сапарлар бар. Журналистер қасымда жүр. Сұрақтарға ашықпыз. Баспасөз қызметім жұмыс істейді. Алматы әкімдігі жабық деп айта алмаймын», – дейді Ерболат Досаев.
