Депутаттың сөзінше, Air Astana әуе парктері Ирландияда тіркелген
Мәжіліс депутаты Бақытжан Базарбек Air Astana компаниясына халықтың шағымы көбейіп кеткенін, оны өз көзімен көргенін айтты, деп хабарлайды Qaz365.kz.
«Жалпы, Air Astanaға мұңымыз жиналып қалыпты. Еділ Терекбайұлы Фостер мырзаға «шаңыраққа қараңыз» деп дұрыс айтты. Фостер мырза менің «досым». Бір рет кездестік. Шыны керек, айтқан сөзіңіздің жаны бар. Халық рейстен қалып, 8 сағат тұрды. Фостер мырза, сол халықтың жанынан өтіп кетті де, тоқтамай, лаудж-барға кіріп кетті. Сол лаундж-барда кофесін ішіп отырды. Мен де сол рейстің ішіндемін. Мен көтеріліп, астында халық күтіп отыр, кәне, түсіңіз дедім. Сонда ол түспейді, өзінің өкілдерін жіберіп қойған. Халықпен кездескісі келмейді. Міне, қарым-қатынас осындай. Тек мен депутаттық куәлігімді көрсеткеннен кейін ғана түсті. Неге? Себебі, Ұлыбританияда депутаттың мәртебесі жоғары. Мәселе сонда боп тұр», - деді ол.
Депутаттың сөзінше, Air Astana әуе парктері Ирландияда тіркелген. Осы орайда Конвенцияның 17 бабына сәйкес әуе кемелері қай мемлекетте тіркелсе, сол мемлекеттің компаниясы. Яғни, әуе кемелерінің 50 пайызы Ирландияда тіркелген.
«Сондықтан конвенция бойынша Air Astana – қазақстандық компания емес, ирландиялық компания. Біз бюджетті миллиардтаған қаржыны ирландиялық компанияға бөліп жатырмыз», - дейді депутат.
