Арзандатылған жанар-жағармайдың мақсатсыз жұмсалуына жол бергендерге қатаң шаралар қабылданады
Бөлінген қаражаттың дұрыс жұмсалуы әкімдіктердің тұрақты бақылауында болатын болады,деп хабарлайды Qaz365.kz.
Бұл туралы Олжас Бектенов бүгінгі Үкімет отырысында мәлідеді.
Биыл дала жұмыстарын қаржыландыру көлемі 700 млрд теңгеге дейін ұлғайтылған.
«Жұмыстарды нәтижелі әрі ұйымдасқан түрде жүзеге асыруымыз қажет. Ауыл шаруашылығы министрлігі жеңілдетілген несиені тиімділігі мен жауапкершілігі жоғары диқандарды қолдауға ғана беруі керек. Бөлінген қаражаттың дұрыс жұмсалуы әкімдіктердің тұрақты бақылауында болуға тиіс», — деп атап өтті Премьер-министр.
Олжас Бектенов шаруаларға тиесілі арзандатылған жанар-жағармайдың мақсатсыз жұмсалуына жол бергендерге қатаң шаралар қабылдауды тапсырды. Энергетика министрлігінің мәліметінше, қазірдің өзінде 400 мың тоннадан астам жеңілдетілген жанар-жағармай бөлінген.
«Энергетика, Ауыл шаруашылығы министрліктері мен өңір әкімдері арзандатылған отынның тиісті көлемін жеткізуді бақылауда ұстасын.
Әкімдіктер бір апта мерзімде өңірлік операторлар бойынша толық деректерді берсін.
Шаруаларға тиесілі отынның сатылып кетуіне жол беретін компаниялар мен жеке тұлғаларға қатысты қатаң шаралар қабылдауды тапсырамын», — деп атап өтті Олжас Бектенов.
