Президент кеңесшісі Ұлттық Банкі Төрағасының бірінші орынбасары қызметіне тағайындалды
Бүгін Мемлекет басшысы Қасым-Жомарт Тоқаевтың өкімімен ҚР Президенті әкімшілігіндегі бірнеше қызметкерлер ауысты, деп хабарлайды Qaz365.kz.
Бұл туралы ақпаратты ҚР Президенті әкімшілігінің баспасөз қызметі мәлімдеп отыр.
Мемлекет басшысының өкімімен Ерұлан Кенжебекұлы Жамаубаев ҚР Ұлттық Банкі Төрағасының бірінші орынбасары болып тағайындалды. Ол Президент кеңесшісі лауазымынан босатылды. Ерұлан Жамаубаев 2022-2024 жылдары Премьер-Министр орынбасары – Қаржы министрі болған болатын.
Сондай-ақ Мемлекет басшысының өкімімен Нұрдәулет Төлеев ҚР Президенті әкімшілігінің Жалпы бөлімінің меңгерушісі лауазымынан босатылып, орнына Ербол Дәненұлы Адаев кірісті. Ербол Адаев бұған дейін ҚР Президент істері басқармасында ұйымдастыру-бақылау және кадр жұмысы бөлімінің меңгерушісі болып жұмыс істеген. Әр жылдары ол Қостанай облысы әкімінің аппаратында, ҚР Мәдениет және ақпарат министрлігінде, ҚР Сенатының аппаратында қызмет атқарды.
Алексей Калайчиди ҚР Президенті Әкімшілігінің Құқық қорғау жүйесі бөлімінің меңгерушісі лауазымынан босатылды. Бұл қызметке Шымкент қалалық Жемқорлыққа қарсы іс-қимыл агенттігін басқарған Дәурен Тілекұлы Ерғарин тағайындалды.
