Депутат реформаның жедел және баяу жүру формасын қай елдерден көруге болатынын айтты
Мәжіліс депутат Ермұрат Бапи Қазақстанда жүргізіліп жатқан реформаның қарқыны жайлы айтты, деп хабарлайды Qaz365.kz.
«Елдегі өзгерістерді соқыр ғана көрмейді. Ол қадау-қадау жасалып жатқан өзгерістер елдегі реформаның қазіргі жағдайдағы ең қолайлы нұсқасы деп ойлаймын. Негізінде реформаның жедел жүргізу формасын Грузиядан көрдік. Екі-үш жылдың ішінде реформа жүріп бітті, бірақ Грузия Абхазиядан, Оңтүстік Осетиядан айырылды», – деді мәжілісмен.
Сондай-ақ депутат реформаның баяу жүру формасын қай елден көруге болатынын айтты.
«Баяу жүру формасын Украинадан көрсек болады. Ол жақта реформа басталды, бірақ ондағы қоғамның жарты бөлігі Еуроинтеграцияға тартты, жартысы Ресейге тартты, жартысы ұлттық саясатқа тартты және соның нәтижесінде реформа жүрмей қалды. Ал нәтижесі – үлкен ғаламдық соғысқа айналып бара жатыр. Міне, осының екі ортасында біз қазіргі біздің елдегі өзгерістер жүргізу саясаты ең қолайлы жағдай деп ойлаймын. Біз біріншіден, мемлекеттік аппаратты, қоғамды және ең бастысы қоғамдық сананы реформалық түйсіктерге негіздеп алуымыз керек», – деді ол.
