Желіде тараған ақпарат шындыққа жанаса ма
Мәжіліс депутаты Елнұр Бейсенбаев ресейлік «Татнефть» компаниясына Атырау мұнай өңдеу зауытының үлесін сату мүмкіндігі туралы ақпаратқа қатысты пікір білдірді, деп хабарлайды Qaz365.kz.
«Менде бұған қатысты ешқандай ақпарат жоқ. Жалпы мұндай істе келісімшарт жасалады, арнайы заңнамалық құжаттар дайындалып, нормативтік-құқықтық актілер реттеледі. Қазір мұндай бірде-бір құжат жасалып жатқан жоқ. Сол себепті бұл тек қауесет», – деді ол.
Депутаттың айтуынша, мұндай сұрақтарды Үкіметке, Энергетика министрліне жолдау қажет.
Осы тұста айта кетейік, Энергетика министрлігі «Татнефть» өкілдері өндірістік тәжірибе алмасу үшін Атырау МӨЗ-бен өзара іс-қимыл жасағанын атап өтті.
«Мұнай өңдеу саласының компаниялары арасында тәжірибе алмасу МӨЗ өндірісінің көрсеткіштерін жақсарту үшін стандартты және кең таралған процесс болып қана қоймайды. Осылайша, министрлік осыған дейін де хабарлағандай, қазіргі уақытта АМӨЗ үлесін сату мәселесі қарастырылмайды», – делінген министрлік хабарламасында.
Еске салсақ, наурыз айының соңында желіде Атырау мұнай өңдеу зауыты активтерінің бір бөлігі ресейлік «Татнефтьке» өтуі мүмкін екендігі туралы хабарламалар жарияланған еді.
