Бұған дейін әлеуметтік желіде бет-аузын тұмшалағандардың суреті тараған еді
Мәжіліс депутаты Ермұрат Бапи Атырауда ту ұстап, тұмшаланып суретке түскендерге қатысты Бас прокурор Берік Асыловқа депутаттық сауал жолдады, деп хабарлайды Qaz365.kz.
Ермұрат Бапи "домбыра харам" дегендерді еске салып, одан кейін де мұндай жағдай тоқтамағанын айтты.
"Мемлекетіміздің басты рәміздерінің бірі – көк Туымызды қорлаушылар бой көрсетті. Жуырда ғана Атырауда болған оғаш оқиға қоғамда үлкен резонанс туғызып, азаматтардың ашу-ызасын тудырып отыр. Мұнда біздің назарымызды аударғаны: көк Тудағы араб қарпіндегі жазудың өте сапалы түрде, арнайы баспа құралымен таңбалануы. Демек бұл – жай ғана тұрмыстық бұзақылық, әдепсіз шектен шығушылық қана емес. Бұл – біздің қоғамымызға, мемлекеттігімізге, ұлттық дәстүріміз бен бірегейлігімізге жасалған ашық және нақақ қарсылық", - деді депутат.
Депутаттың айтуынша, мемлекеттік туды қорлау – бүкіл халықты, тұтас мемлекетті қорлау.
"Ескере кететін бір жайт: елдің Туын бүлдіру арқылы жат пиғылды дәріптемек болған бұл төрт қыз әлдебір арандатушы топтың құрбаны болуы мүмкін. Олар жастық алаңғасырлықпен, әлде материалдық қызығушылықпен немесе діни сауатсыздықпен жасаған бұл өрескел заңбұзушылықтың тасасында тұрған әлдебір кереғар күштер бар сияқты. Әкімшілік тұрғыдағы жазасын алған төрт қыздан бұрын осы қылмысты әрекетті ұйымдастырушылар жазаға тартылуға тиіс", - деді ол.
Ермұрат Бапи түр-түсі бұрмаланған Қазақстан туы маркетплейстерде 5000 мың теңгеден еркін және ашық саудада сатылып жатқанын сынады.
"Бұл – жеке біреулердің діни көзқарасын білдіруі емес, қоғам тұрақтылығын, мемлекеттік тұтастықты бұзуға бағытталған нақақтан-нақақ жасалған арандату. Мұны ежелден қалыптасқан діни бірлік пен қоғамға жарықшақ салудың қаскөй әрекеті деп бағалау керек! Сонымен қатар, бұл оқиғаның арандатушылық мазмұны мен мемлекеттік тудың бетінде қолданылған символиканың сипаты оның алдын ала жоспарланғанын, әлдебір топтың нақақ ұйымдастырғанын көрсетеді. Бұған кім тапсырыс берді? Ұйымдастырушылардың мақсаты қандай? Бұл сұрақтарға құқық қорғау органдары нақты жауап беруге тиіс! Мұндай арандатушылықтың қайталануына жол бермеу үшін тергеу-тексеру шарасы жан-жақты жүргізілуі қажет", - деді ол.
Айта кетейік, бұған дейін әлеуметтік желіде бет-аузын тұмшалағандардың суреті тараған еді. Олар Сауд Арабиясы туының элементтері бар Қазақстан Туын ұстап тұрғаны көрінеді.
