Мұны дәрігерлер растады.
АҚШ-тың бұрынғы президенті Джо Байденге қуықасты безінің агрессивті қатерлі ісігі диагнозы қойылды. Бұл ақпарат 18 мамырда жарияланған ресми мәлімдемеде расталды. Жаңалықты бірнеше америкалық БАҚ таратып үлгерді, деп хабарлайды qaz365.kz.
Байден соңғы аптада зәр шығаруға байланысты қиындықтарға тап болып, медициналық тексеруден өткен. Тексеру нәтижесінде қуықасты безінде түйін анықталып, қосымша сараптамалар жүргізілді. Жұма күні дәрігерлер оның қатерлі ісікке шалдыққанын ресми түрде растады.
Мәлімдемеге сәйкес, ісік Глисон шкаласы бойынша 9 баллға бағаланған және сүйекке метастаз берген. Бұл — аурудың аса қауіпті әрі жылдам таралатын түрі екенін көрсетеді. Дегенмен қатерлі ісік гормондарға сезімтал болғандықтан, оны емдеу мүмкіндігі бар екені айтылды.
Қазіргі таңда Байден мен оның отбасы білікті мамандармен бірлесіп, емдеу әдістерін мұқият қарастырып жатыр.
