Қырғызстан президенті Садыр Жапаров жексенбі күні халыққа үндеу жасап, елде мемлекеттік төңкеріс жасауға ешқандай мүмкіндік берілмейтінін мәлімдеді, деп хабарлайды Qaz365.kz АКИpress-ке сілтеме жасап.
Мемлекет басшысы әлеуметтік желіде жариялаған мәлімдемесінде ел ішінде «жаман ниеті бар топтардың» бар екенін атап өтті. Оның айтуынша, бұл топтар қоғамдағы мәселелерді әдейі асырып көрсетіп, халықты арандатып, алдағы сайлау кезінде тұрақсыздық туғызуға үміттеніп отыр.
«Олардың қатарында – бұрын ірі коррупциялық істер бойынша ұсталып, сот шешімімен мемлекетке қомақты қаражат немесе мүлік өтегендер; көлеңкелі схемалары жойылып, табысынан айырылғандар; қызметтен кетіп, жеке пайдасы үшін өштік ұстағандар бар. Басқаша айтқанда, жеке мүддесі үшін өкпелеген адамдар», – деді Жапаров.
Президент кейбір азаматтарды елде хаос боларына үміттенбеуге шақырып, билік тұрақтылықты қамтамасыз ету үшін барлық шараларды қабылдайтынын айтты.
Ресми мәлімдемеде қоғамды алаңдататын кез келген іске жол берілмейтіні, сондай-ақ саяси тұрақтылықтың басты басымдық екені ерекше атап өтілді.
