Ресей Федерациясының президенті Владимир Путин Тәжікстан президенті Эмомали Рахмонға Мәскеу маңындағы мектепте қаза тапқан тәжікстандық оқушыға байланысты көңіл айтты, деп хабарлайды Qaz365.kz «Интерфаксқа» сілтеме жасап.
Владимир Путин баланың өліміне себеп болған қылмысқа қатысы бар тұлғалардың заң алдында жауап беретінін атап өтті.
– Балаларға қарсы жасалған мұндай қылмыс – аса жиренішті әрекет. Тергеу толық жүргізіліп, кінәлілер міндетті түрде жазаланады, – деді Ресей президенті.
Қайғылы жағдай 16 желтоқсанда Мәскеу облысындағы Горки-2 елді мекенінде орналасқан мектептердің бірінде болған. Тәжікстан азаматы, 9 жастағы Кобилджон Алиевке 15 жастағы жасөспірім пышақпен шабуыл жасап, оқушы алған жарақатынан көз жұмған. Күдікті қамауға алынып, тергеу изоляторына қамалды.
Ресейлік бұқаралық ақпарат құралдарының жазуынша, шабуыл жасаған жасөспірім өз әрекетін видеоға түсіріп, оны жеке Telegram арнасына жариялаған. Бейнежазбада оның пышақ ұстап, балаларға жақындап, ұлты жөнінде сұрақ қойғаны көрінеді.
Оқиғадан кейін Тәжікстанның Сыртқы істер министрлігі Ресейдің елшісін шақырып, ресми нота тапсырды. Онда тергеуді жан-жақты жүргізіп, кінәлілерді қатаң жауапкершілікке тарту талап етілген.
