Мемлекет басшысы Қасым-Жомарт Тоқаев Қазақстанның саяси тарихындағы маңызды қадамдардың бірі – жаңа Конституцияны қабылдау бойынша республикалық референдум өткізу туралы Жарлыққа қол қойды, деп хабарлайды Qaz365.kz Ақордаға сілтеме жасап.
Қазақстан Республикасының Президенті Қасым-Жомарт Тоқаевтың Жарлығымен 2026 жылғы 15 наурызға республикалық референдум тағайындалды. Отандастарымыз дауыс беру парағындағы мынадай жалғыз сауалға жауап беруі тиіс:
«Жобасы бұқаралық ақпарат құралдарында 2026 жылғы 12 ақпанда жарияланған Қазақстан Республикасының жаңа Конституциясын қабылдайсыз ба?»
Неліктен түзетулер емес, жаңа Конституция?
Конституциялық реформаның басында қолданыстағы Ата Заңның 77 бабына (мәтіннің 84%-ы) өзгерістер енгізу жоспарланған болатын. Алайда, 29 қаңтарда өткен Конституциялық комиссияның отырысында сарапшылар мен мүшелер өзгерістердің ауқымдылығы соншалық — бұл елдің бүкіл «мемлекеттік матрицасын» трансформациялайтынын ескеріп, жаңа Конституция қабылдау қажет деген қорытындыға келді.
Жаңа Ата Заң жобасы туралы не білеміз?
Құрылымы: Жоба преамбуладан және 11 бөлімнен тұрады, барлығы 95 бапты қамтиды.
Жариялануы: Конституцияның толық мәтіні мен Президент Жарлығы бұқаралық ақпарат құралдарында 12 ақпан күні ресми түрде жарияланады.
Дайындық: Референдумды ұйымдастыру Орталық сайлау комиссиясына (Орталық референдум комиссиясы) және Үкіметке жүктелді.
Маңызды даталар хронологиясы:
21 қаңтар: Конституциялық комиссия құрылды.
31 қаңтар: Жаңа Конституцияның алғашқы жобасы жарияланды.
11 ақпан: Комиссия жобаны референдумға шығаруды ұсынды.
12 ақпан: Жобаның қорытынды нұсқасы халық назарына ұсынылады.
15 наурыз: Бүкілхалықтық дауыс беру күні.
