Украина Президенті Владимир Зеленский Беларусь басшысы Александр Лукашенкоға қарсы жеке санкциялар салу туралы жарлыққа қол қойды. Бұл шешім Украинаның Ұлттық қауіпсіздік және қорғаныс кеңесінің ұсынысы негізінде қабылданды, деп хабарлайды Qaz365.kz Украина президентінің ресми сайтына сілтеме жасап.
Лукашенкоға қатысты жалпы саны 17 түрлі шектеу шарасы енгізілді. Олардың ішінде:
Активтерді бұғаттау және қаржылық операцияларға тыйым салу;
Украина аумағына кіруге тыйым салу;
Сауда-саттық пен транзитті тоқтату;
Технологиялар беруді бұғаттау.
Шектеулердің бір бөлігі 10 жылға созылса, кейбір шаралар мерзімсіз (тұрақты) күшіне ие болады.
Владимир Зеленский бұл қадамды Беларусь басшысының Ресейдің әскери агрессиясына тікелей жәрдемдесуімен түсіндірді. Украина басшысының айтуынша, 2025 жылдың екінші жартысында Беларусь аумағында ресейлік соққы беруші дрондарды басқаратын ретрансляторлар жүйесі орнатылған. Бұл Украинаның солтүстік облыстарына (Киевтен Волыньға дейін) соққы жасау мүмкіндігін арттырған. Беларусь аумағында Ресейдің «Орешник» баллистикалық зымыраны орналастырылған. Сонымен қатар 3000-нан астам белорус кәсіпорны Ресейдің әскери өнеркәсібіне қажетті компоненттерді жеткізіп отыр.
"Ресейліктер Беларусьтің көмегінсіз біздің энергетикалық нысандар мен теміржолдарымызға мұндай жойқын соққылар жасай алмас еді", — деп жазды Зеленский өзінің Telegram-арнасында.
Айта кетейік, осы жылдың 25 қаңтарында Зеленский Вильнюсте белорус оппозициясының лидері Светлана Тихановскаямен алғашқы ресми кездесуін өткізген болатын.
Сарапшылардың пікірінше, Киевтің бұл санкциялық қысымы Лукашенконың халықаралық оқшаулаудан шығу әрекеттеріне тосқауыл қоюды және оны әскери қылмыстар үшін жауапкершілікке тартуды көздейді. Украина тарапы қазіргі уақытта Беларусь басшысына қарсы қылмыстық іс қозғау мәселесін де қарастырып жатыр.
